Guzar Rahay Hain Jo Mujhpe Azaab Uske Hain
Keh Meri Chashm-E-Tamanna Main Khwab Uske Hain
Main Zakhm Zakhm Hun Mera Naseeb Hain Kantay
Woh Rang Rang Hai Saaray Gulaab Uske Hain
Kitaab Meri Qalam Mera Soch Bhi Meri
Magar Jo Likhay Hain Main Ne Woh Baab Uske Hain
Nahi Hai Mere Muqaddar Ka Aik Bhi Taara
Yeh Kehkashan Yeh Maahtaab Uske Hain
Wisaal-O-Hijr Ka Mousam Ussi Ka Mousam Hai
Sawaal Mere Hain Shayed Jawaab Uske Hain
Woh Meri Zaat Ka Aek Mustanid Hawala Hai
Kitaab-E-ishq Ke Saaray Nissaab Uske Hain